Naxçıvanda yüksək bal toplamış məzunlarla görüş olub

Avqustun 26-da Naxçıvan Muxtar Respublikasının ümumtəhsil məktəblərini bitirərək ali məktəblərə qəbul imtahanlarında yüksək bal toplamış məzunlarla görüş keçirilib.
Naxçıvan Muxtar Respublikası Ali Məclisinin Sədri Vasif Talıbov ali təhsil müəssisələrinə qəbul imtahanlarında yüksək nəticə göstərən bütün məzunları, onların valideynlərini və təhsil ictimaiyyətini təbrik edib, gələcək təhsildə gənclərə uğurlar arzulayıb.
Naxçıvan Muxtar Respublikasının təhsil naziri Rəhman Məmmədov deyib ki, 2021-2022-ci tədris ili üzrə ümumtəhsil məktəblərini Heydər Əliyev adına Hərbi Lisey də daxil olmaqla, 2990 məzun bitirib, onlardan 2848-i, yaxud 95 faizi ali və orta ixtisas təhsili müəssisələrinə sənəd verib. Məzunların buraxılış imtahanlarındakı nəticələri ötən illə müqayisədə xeyli artıb. Muxtar respublikanın şəhər və rayon mərkəzlərindəki ümumtəhsil müəssisələri ilə yanaşı, ucqar dağ kəndlərindəki məktəblərdə də yaradılan müasir təhsil infrastrukturunun nəticəsidir ki, məzunları yüksək nəticə göstərən 100 məktəbdən 71-i ucqar kənd məktəbləridir. Rəhman Məmmədov muxtar respublika təhsilinin inkişafına göstərilən diqqət və qayğıya görə bütün təhsil işçiləri adından minnətdarlıq edib.
Valideyn Lətifə Zeynalova çıxış edərək deyib ki, müəllimi olduğum Heydər Əliyev adına tam orta məktəb üçün 2004-cü ildə müasir üslubda bina inşa olunub. Məktəbimizdə müasir tədris şəraiti yaradılıb. Bunun nəticəsidir ki, hər il məzunlarımız buraxılış və qəbul imtahanlarında uğurlu nəticə əldə edirlər. Ötən tədris ili də bu baxımdan uğurlu olub. 8 məzunumuz 500-700 arası bal toplayaraq bugünkü görüşdə iştirak edirlər. Bu məzunlardan biri də övladım Zəkiyə Zeynalovadır. O, buraxılış və qəbul imtahanlarının nəticəsinə görə, ümumilikdə, 591 bal toplayıb. İstənilən valideyn üçün bundan böyük xoşbəxtlik, sevinc ola bilməz. Lətifə Zeynalova muxtar respublikada elmə, təhsilə göstərilən diqqətə görə bütün valideynlər və müəllimlər adından minnətdarlıq edib.
Qəbul imtahanlarında 692 bal toplayan muxtar respublika birincisi, məktəbi “Qızıl” nişanla bitirmiş Nərmin Vəliyeva məzunlar adından minnətdarlıq edərək deyib ki, muxtar respublikada ənənə halını almış yüksək bal toplayan məzunlarla görüşdə iştirak etmək mənim ən böyük arzum idi. Sevinirəm ki, buraxılış və qəbul imtahanlarında yüksək nəticə göstərərək Ali Məclisin Sədri ilə görüşdə iştirak edirəm. Biz gənclərin həyatında heç vaxt unudulmayacaq bu görüşdə iştirak edə bilməyimiz üçün yaradılan şəraitə görə yüksək bal toplayan məzunlar adından minnətdarlığımı bildirirəm. Mən buraxılış imtahanlarında 292 bal, qəbul imtahanlarında isə I ixtisas qrupu üzrə ən yüksək nəticə göstərərək 400 bal toplamışam. Ümumilikdə, 692 balla məzunlar arasında muxtar respublika birincisi olmuşam və “Qızıl” nişanla təhsilimi başa vurmuşam. Söz veririk ki, harada təhsil almağımızdan, harada yaşamağımızdan asılı olmayaraq ümummilli liderimiz Heydər Əliyev ideyalarının davamçıları olacaq, Naxçıvan gəncliyinin adını daim zirvələrdə tutacaq, ölkəmizin çiçəklənməsinə öz töhfəmizi verəcəyik.
Sonra ali məktəblərə qəbul imtahanlarında 500-700 arası bal toplayan məzunlara “Naxçıvan: Şərqin əfsanəsi” kitabı və pul mükafatı təqdim olunub.
Ali məktəblərə qəbul imtahanlarında yüksək bal toplayan məzunlardan Nigar Kərimova, Ülviyə Axundova, Arzu Hüseynova, Mayıl Səfərli, Hüseyn Paşazadə və Vüsal Hüseynli göstərilən qayğıya görə minnətdarlıq edib, Ali Məclisin Sədri ilə görüşdən qürur duyduqlarını bildirib, ixtisaslı kadr kimi yetişəcəklərinə söz veriblər.

717789
Bu gün
Dünən
Bu həftə
Bu ay
Ümumi
517
1048
4969
23908
717789

NAXÇIVAN MUXTAR RESPUBLİKASI

  • 1.jpg
  • 2.jpg
  • 3.jpg
  • 4.jpg
  • 5.jpg
  • 6.jpg
  • 7.jpg
  • 8.jpg
  • 9.jpg
  • 10.jpg
  • 11.jpg
  • 12.jpg
  • 13.jpg
  • 14.jpg
  • 15.jpg
  • 16.jpg
  • 17.jpg
  • 18.jpg