Ağbulaq istirahət mərkəzində gənclərlə görüş olub
Naxçıvan Muxtar Respublikasının Gənclər Fondu və Naxçıvan Muxtar Respublikasının Həmkarlar İttifaqları Şurasının birgə təşkilatçılığı ilə 24-26 sentyabr tarixlərində “Gənclər təşkilatlarının 2022-ci il üçün fəaliyyət strategiyasının planlaşdırılması düşərgəsi” keçirilib.
Düşərgənin keçirilməsində məqsəd növbəti il ərzində həyata keçirilməsi nəzərdə tutulan layihə və tədbirlər, yeni təşəbbüslər barədə müzakirələrin təşkili, gənclər təşkilatlarının fəallığının artırılması, gənclər təşkilatları arasında əlaqələrin genişlənməsi, şəbəkələşmənin inkişafıdır. 25 sentyabr tarixində keçirilən düşərgədə Naxçıvan Muxtar Respublikası Əmək və Əhalinin Sosial Müdafiəsi Nazirliyinin əməkdaşları tərəfindən gənclərə “Əmək münasibətləri, əməyin mühafizəsi və texniki təhlükəsizlik qaydaları” mövzusunda məlumat verilib. Həmçinin mövzu ilə bağlı suallar cavablandırılıb, video çarx və slayd nümayiş etdirilib.